رئيس الجمهورية عندو ٱليات دستورية باش يحلحل الوضع وينحي البلوكاج… لأنك ولو تكون ضد الخوانجية ما تنجمش تقبل أنها البلاد الكلها تقعد واقفة لمجرد عركة بين رؤوس السلطة هي في النهاية عركة صلاحيات…
ويلزم الرئيس هذا يستعمل صلاحياتو في صالح البلاد… وإلا يمشي على روحو… موش عاجبك رئيس الحكومة ؟ عندك ٱلية الفصل 99 الي حطها الدستور لحل الأزمات…استعملها وأطلب تصويت ثقة في مواصلة الحكومة لنشاطها…
وخويا العزيز راك رئيس جمهورية موش مدير مسرح باش تعمللنا مونولوقْ ما عاد يهم حد… راك أقوى منصب سياسي في البلاد… ومن المفروض تعمل السياسة وتناور وتصنع جوك بالتحالفات…موش تقعد تتلغم علينا قريب العامين من غير نتيجة…
السياسي الذكي هو الي يعمل تحالفات تكتيكية ولو ظرفية لتحقيق أهدافو… وعندك عبير موسي ونبيل القروي والتيار والشعب والناس الكل الي طيحو حكومة الجملي… تنجم تغلب بيهم الغنوشي في البرلمان… وتطيح الحكومة وتشكل الحكومة الي تحب عليها….
شكون ينجم يلمهم كان ما تلمهمش انتي ؟ أعمل شوية سياسة وأخطأك من الشعارات الفارغة… التجمع كنت تخدم مع الأكاديمية متاعو… وعمرنا لا نعرفوك شاركت نهار في مظاهرة وإلا تحرك ضد نظامو… ولا تكلمت كلمة… حتى الوضع الثوري… لا مسبوق ولا غير مسبوق ما ينجم ينطبق عليك…
وأصلا تونس يلزمها تخرج من منطق الثورة الي ولى بصراحة تعيس بعدما استولاو عليه الإرهابيين وقطيع الجاموس الي مساندهم….لمنطق الدولة… وكانك على الفاسدين هاك مستقبل الفخفاخ والشاهد في القصر وعندهم برشه شبهات…
هو انتي الي نقب عينين التوانسة بالرش… استقبلتو في القصر…. وحتى الي متورط في ارهاب واغتيالات وتفجيرات… وتحكي على النظافة ؟
سيب عليك من التجغجيغ الفارغ…ما عاد يصدقك حد… وأعمل قراءة ذكية للتوازنات السياسية وكان ما تعرفش ايجا نبعثوك لشكون يقريك شوية سياسة على قاعدة تسلك بيها أمورك…
وتحرك…أعمل تحرك سياسي حقيقي يخلص البلاد من شرهم… حتى حد ماهو باش يقبل تقعد تحكي على مؤامرات 3 سنين أخرين وانتي بارك في بلاصتك… على خاطر أنا نعرف وانتي تعرف الي تعطيلك لأي تحرك مشترك مع عبير ولا سيما القروي لإزالة مافيات الإرهاب من السلطة… السبب الرئيسي متاعو خوفك من أنو التطبيع معاهم يجعلهم منافسين جديين في الانتخابات الجاية… موش تجمع ولا فساد ولا قصبة العود…
وانتي مشكلتك الوحيدة تعاود دورة أخرى بنفس الطريقة…الجمود وغياب البرامج واللعب على النظافة المزعومة… هذا الكلو ما عادش يبيع…
أعمل سياسة وأعطي للبلاد أمل… وإلا سيب عليك راهي باش تنهار في عهدك السعيد… تحرك سياسيا وعلى قاعدة كيفما يعملو رؤساء الدول المحترمين الكل… وحتى الاستقالة راهي عمل سياسي…عجزت ؟ ما تنجمش ؟ قلبك يعصر عليك ؟ بره شد دارك خلي البلاد تجيب شكون ينجم يواجه…أكهو كملنا ولا سلام ولا كلام ولا السيل ولا الز…
بقلم سامي بن سلامة